Sunday, February 28, 2010

《長頸鹿吞噬火星》

講開又講,個日同你一齊嗰個係邊個黎架?佢好似一個人,一個同我好耐無聯絡既朋友。我唔知點形容我同佢既關係,就好似...好似,好似火星同長頸鹿,即係...佢地唔係好有關係,但係你同我都知咩係火星,咩係長頸鹿。最近我睇左本書叫做《長頸鹿吞噬火星》,睇個名好似唔係好吸引呵?不過入面講D野幾好笑。本書講隻長頸鹿點去火星,唔係講笑,佢真係好認真咁分析點樣將隻長頸鹿送上火星。本書除左講點樣將隻長頸鹿塞入隻太空船到,仲分析埋隻長頸鹿既心理質素,我知你可能對呢D野無咩興趣,但係有D野好難講,話唔定你會鍾意長頸鹿,又鍾意火星,即係有時D野真係話唔埋。講過秘密你知,但係你千祈唔好同人講喎。其實我養過長頸鹿。不過...佢條頸好短。細個去動物園,我同老豆講,我想要隻長頸鹿,跟住隔左幾日,佢真係帶左隻長頸鹿返黎,我嗰時得五歲,但係我都知長頸鹿係點樣,所以除左佢係條頸短左D之外,佢應該真係一隻長頸鹿。我仲好記得老豆講左句野,佢話:你唔好以為長頸鹿一定係長頸先得架,生得長定生得短,呢D係天生架嗎?如果我有日變矮左,咁就唔係你老豆咩?我老豆係有時有D癲癲地,但係都唔會蠢到連長頸鹿都分唔到呱。隻長頸鹿我養左一年就唔見左,嗰時我喊得好犀利,但係老豆話佢要走既,你都阻唔到佢,好快你就會唔記得佢架啦,等你再記番佢個時,佢都可能去左火星架啦。估唔到,長頸鹿真係去左火星。你做咩唔出聲呀?我講得好悶呀?咁最多講過其他野羅,唔使黑晒面呀。

No comments: